終於......驚完喇

杜牙根療程終於都做哂喇

, 只係第一次需要打麻醉針, 第二次同 final 就直情連針都唔使打, 最初我都好驚唔打麻醉針會好痛架

, 不過好彩個感覺唔係咁大啫; 同埋都要多謝個醫生, 佢好nice架, 仲好似氹細路咁氹我呀, 搞到我都有d唔好意思tim

 

整完牙, 食神又開始嚟喇, 呢兩日 Manager A & B 爭住請我哋食 lunch, 琴日就去飲茶, 今日就去咗別府, 唔知會唔會陸續有嚟呢

又要肉隨砧板上 =.=

我排牙真係多災多難

, 話說喺過去10年內已經因為4隻智慧齒唔夠位生而要開刀剝咗佢, 嗰吓都未驚完, 個牙醫就同我講我仲有3隻叫「梁氏小臼齒」ge傢伙, 痛ge時候就要做杜牙根

, 本來諗住咁多年都冇事, 應該都唔使驚啦, 點知........早兩日有一隻開始唔舒服, 到今日仲痛tim, 唉~~ 真係避無可避, 仲要我係超驚睇牙醫架, 點解會咁架.........

♥ 真係 Sweet 到爆呀 ♥

世界杯終於都曲終人散la, 而最能令我留下深刻印象ge多數都係守門員, 繼好耐之前ge阿根廷門將Sergio Goycochea之後, 今屆就留意到呢位耶辛獎(最佳守門員)得主 - IKER Casillas

 

佢喺賽後接受身為電視女主播的女友訪問時.........

真係sweet到爆呀

端午節 の 下午茶篇

每逢holiday都會瞓到黃朝百晏先起身

, 出到去已經係下午茶時間, 今日就揀咗間好耐冇去ge韓國餐廳, 食飽飽先去行街街

DiNNer @ Tao Heung

星期一阿媽話唔煮飯要出去食喎, 咁就揀咗間最近重開ge稻香超級漁港, 我之前喺網上見到d人話呢期送波士頓龍蝦, 但去到又唔見有推介, 咁咪問吓d侍應囉, 點知個侍應竟然話冇聽過喎,

吓!? 唔係啩? 後來個侍應話去問吓經理, 原來佢話稻香分好多條線, 咁啱呢間冇喎, 不過唔緊要, 一樣無損食飯ge心情

 

孖寶一 : 松露汁煎班片 & 陳皮杞子蒸班腩, 個松露汁好味, d魚都好滑

 

孖寶二 : 北菇鵝掌 & 瑤柱扒菜苗

 

 

仲有就係老豆最鐘意ge咖哩燜雞併煎餅, 個咖嘢好香

我的家樂氏Special K

眼見體重不斷上升, 脂肪就日積月累咁往腿上爬, 褲管就一日窄過一日, 小啤梨就嚟要變成大啤梨喇

!!!!!

 

早前已經開始喺晚餐減少食飯同食肉ge份量, 體重開始有少少回落, 但象腿情況仍然持續, 最衰我又C懶, 唔鐘意做運動, 只靠一星期兩堂瑜伽似乎唔係好夠, 咪唯有又從飲食方面入手囉, 咁啱今日行過超市, 見到最近成日喺電視賣廣告ge家樂氏Special K

, 脂肪含量低於2%, 一於買嚟試吓先, 一包夠我食4-5日, 唔知兩個星期後會唔會有進展呢

歷史博物館一天遊

話說係過去ge復活節假期, 特別安排咗一日去行吓呢個歷史博物館, 最初仲驚會有d悶, 點知最有興趣嗰個竟然係我老爹wor